Abadlığa sakinlər qoşulub

“Bakı Abadlıq Xidməti” tərəfindən həyata keçirilən bağ güllərinə qulluq layihəsi 5 il əvvəl Balaxanıda başlayıb və zamanla Ramana, Əmircan, Novxanı, Pirşağı, Zirə kimi digər kəndlərə də yayılıb. Layihə çərçivəsində bu kəndlərdə bağ güllərinin becərilməsi üçün həyətlər təyin edilib, sakinlərə həyətlərində əkmələri üçün müxtəlif bitkilər təqdim olunur, qulluq göstərmələri üçün ödəniş edilir və yetişdirilən güllər təhvil alınır.

Layihənin icrası müddətində bağ güllərinin becərilməsi üçün ayrılmış həyətlərin sayı 696-dan 1067-yə yüksəlib, ümumi maaş məbləği isə 99,463 AZN-dən 111,180 AZN-ə qədər artıb.

Bu təşəbbüs həm ekoloji mühitin yaxşılaşdırılması, həm də sakinlərin məşğulluğunun artırılması baxımından böyük əhəmiyyət daşıyır. Layihənin əsas məqsədlərindən biri də “Bakı Abadlıq Xidməti”nin əməkdaşlarının sakinlərə bitki baxımı ilə bağlı bilik və bacarıqları öyrətməsidir.

Əvvəllər gül yetişdirmək təcrübəsi olmayan sakinlər, mütəxəssislərin köməyi ilə sulama, alaq otlarının təmizlənməsi və güllərə qulluq kimi vacib biliklərə yiyələniblər. Bu layihə həm də sakinlərə yeni bacarıqlar qazandıraraq, onların həyat səviyyəsini yüksəltmişdir.

“Bakı Abadlıq Xidməti”nin bu layihəsi həm sakinlər, həm də qəsəbələrin ümumi ab-havası üçün mühüm əhəmiyyət kəsb edir. Gələcəkdə bu tip ekoloji və sosial layihələrin genişlənməsi, qəsəbələrin və paytaxtın daha yaşıl və abad olmasına böyük töhfə verəcəkdir.

Bu layihə, sakinlərin fəal iştirakı ilə daha yaşıl, təmiz və abad bir mühit yaratmaq istiqamətində mühüm bir addımdır.